头字歌〔弹词开篇〕 [复制链接]

第7版()
专栏：

头字歌〔弹词开篇〕
上海长征评弹团看今朝，想前头，伲农民一世勿抬头：头上面，顶着三块大石头，掮着铁搭大锄头，起早做到黄昏头，等到秋后想有望头，地主是一部车子推到场口头，一管大秤廿两头，拿全年租米一算头，刮来单剩根老骨头，伲穷人是，一年四季忙到头。早上吃了勿晓得下昼头，今朝吃了勿晓得明朝头，年初一要急到年夜头，身上面，寒夏裤子只有一条
头，冷天是空头棉袄无领头；屋里半间草屋住了五家头，落雨漏到胸口头，行灶砌在床横头；到春荒青黄勿接头，手里拿根坏竹头，篮里放只破袋头，要想借点麸皮头，来到地主门口头，被地主骂得勿透头，被黄狗咬到脚跟头；走来走去无走头，回到自家破房头，黄昏哭到半夜头，只好钻进破被头，肚皮饿到五更头，伲穷人是，一生一世难出头！自从来了共产党，伲穷人翻身出了头。踢掉三块大石头，互助组织初起头，合作社大家有劲头，人民公社更加有苗头。八字宪法记心头，肥料积得像山头。土地连成一片头，低田种水稻，高田种黄豆。但只见，一片金黄稻穗头，棉花好像白云头。敬老院，有迷花眼笑的老老头，托儿所，有白白胖胖的小毛头。家里住着清凉瓦屋五间头，身上挽边裤子尖领头。进出衣衫两套头，绒线衣裳几件头。钢笔插在袋口头，银行里面开户头。炊事员立在灶前头，烧出来小菜几样头，顿顿有得换花头，吃饭香得无话头。鸡鸭猪羊养了几万头，还有青鱼白鱼黄鲢头，捉起来送到城里头。工人吃了有劲头，造出拖拉机，送到田里头。抽水机装在河边头，广播喇叭吊在屋檐头，电灯装在路口头。分工合作并肩头，社办工厂办起头。只要有冲天干劲勿脱头，接受任务勿摇头，党的教育永远记心头，样样事体肯带头，改变一穷二白有劲头，有劲头，灿烂生活就在面前头！〔根据上海崇明民歌编写〕